పోలీసుల కాల్పుల్లో నలుగురు గ్యాంగ్‌స్టర్ల హతం.. ముగ్గురు పోలీసులకు గాయాలు

గురుగ్రామ్‌లో నిన్న జరిగిన భారీ పోలీస్ ఎన్‌కౌంటర్‌లో నలుగురు గ్యాంగ్‌స్టర్లు హతమయ్యారు. సుశాంత్ లోక్ ఫేజ్-2లోని ఒక ప్రముఖ వ్యాపారి నివాసం సమీపంలో జరిగిన ఈ ఎదురుకాల్పుల్లో మరో గ్యాంగ్‌స్టర్‌ గాయపడగా, ముగ్గురు పోలీసు సిబ్బందికి కూడా గాయాలయ్యాయి.

పోలీసుల కథనం ప్రకారం, ఎస్‌జీటీ యూనివర్సిటీ వ్యవస్థాపకుడి కుమారుడి నుంచి డబ్బు వసూలు చేసేందుకు కొందరు సాయుధ దుండగులు ఎస్‌యూవీలో వచ్చారు. విదేశాల్లో ఉంటున్న గ్యాంగ్‌స్టర్ దీపక్ నందల్ పేరుతో వీరు బెదిరింపులకు పాల్పడినట్లు సమాచారం. దుండగులు వ్యాపారి ఇంటిపై కాల్పులు జరపడంతో, సమాచారం అందుకున్న క్రైమ్ బ్రాంచ్ పోలీసులు తక్షణమే ఘటనా స్థలానికి చేరుకున్నారు. ఈ క్రమంలో పోలీసులకు, గ్యాంగ్‌స్టర్లకు మధ్య భీకరమైన కాల్పులు చోటుచేసుకున్నాయి.

ఈ ఎన్‌కౌంటర్‌లో నలుగురు గ్యాంగ్‌స్టర్లు అక్కడికక్కడే హతమయ్యారు. మరొకరు గాయపడ్డారు. ఈ ఘటనలో ముగ్గురు పోలీస్ సిబ్బందికి గాయాలయ్యాయి. ఫోరెన్సిక్ బృందాలు ఘటనా స్థలాన్ని క్షుణ్ణంగా పరిశీలించాయి. నిందితుల నుంచి మారణాయుధాలను స్వాధీనం చేసుకున్నట్లు అధికారులు వెల్లడించారు. మరణించిన గ్యాంగ్‌స్టర్ల నేర చరిత్రకు సంబంధించిన పూర్తి వివరాలను త్వరలోనే వెల్లడిస్తామని పోలీసులు పేర్కొన్నారు.